Waa maxay guur: Baro 3 waxyaabood uu guurka leeyahay

Waxaan maanta qormadeena ku soo qaadaneynaa waa maxay guur, Maxaase lagu macneeyaa erayga guur. Guurka macnahiisu waxaa garanayo qof walbaa.


Laakin kama hadlayo in la is guursado misana qoys la sameyso balse waxaan rabnaa inaan sharaxno macnaha erayga guur. Guurku waa nasteexo, waa wax loo baahan yahay.


Baro 3 waxyaabood uu guurku leeyahay

  1. Guur

  2. Shukaansi

  3. Xaflad Aroos

Guur: Xaflad Aroos

Haddii aan nahay dhalinyaro waxaan dooneynaa guur, inaan guursano, awlaad aan dhalno, nolol qurux badan ku noolaano. Nolol aanan cidlo dareemeynin misana aad ku faraxsantahay.


Su,aasha ugu horeyso ee aan isweydiineyno ayaa ah waaa maxay guur waana su,aal u baahan inaan fahanno ka hor guurka, si guurkeenu uu u noqdo mid miro dhal ah.

1. Waa maxay Guur?


Guurku waa nasteex, waa aasaaska aadanaha nolosha, Guurka waa wax laga maarmaan ah, noloshu bilaa guur aysan macno lahayn. Guurku waxaa afafka qalaad lagu yiraahdaa (Afka ingiriis: Marriage: Af Carabi: زواج) Guurku waxa uu kamid yahay dhacdooyinka ay ku midoobaan sida nin iyo naag, kuwaasoo ugu dambeys hadafkooodu yahay in ay nolol wadaagaan, iskana caawiyaan wax walbaa oo noloshooda ku saabsan.


Waxaa labada qofood ka dhexeeyo isla shaqeyn. Guurku waa wada nolaasha, in noloshu laba qofood ay ku wadaagan. Waxaa uu inta badan ka bilaawdaa jaceyl ay isu qabaan labo qofood. Marmarka qaar waxaa dhacdo in ay is guursadaan laba qofood oo aan weligood jaceyl ama sheeko aanan dhex marin.


Guurku waa heshiis ama ogolaansho ka dhexeeyo labada qofood. Waxaa mararka qaar dhacdo in nin uu jeclaado gabar misana loo soo doono iyadoo weliba laga yaabo inaysan raali ka ahayn guurkaasi balse ixtiraameyso waalidkeed.


Dhaqanka nuucaasi ah wuxuu jiri jiray waa hore balse maanta waa mid gabaabsi ah. Maxaa ka dhigayo gabaabsi? Sababtoo ah waxaa batay dhibaatadiisa. Labo qof oo aan raali isku ahayn weey adag tahay inay sii wada noolaadan. Dhibaatada ugu horeyso waxay ka imaaneysaa isfahanka waana sababta ay muhiim u tahay in qofka dooqiisa loo daayo.


Waxaa inta badan dhacdo in nin uu soo doonto gabar, markii loo guuriyana uu ku ciyaaro gabarnimadeeda kaidbna uu soo furo, waalidkeed waxaa laga yaabaa inaysan taa ka fikirin, qofka la noolaanayo ninkaasi waa gabadha la soo doontay ee ma ahan reerka. Guurka waa inuu ahaado mid aanan murugo lahayn misana farxad badan.


Qofk markuu qof kale guursanayo waxay ku haboontahay inay iyaga heshiiyaan, si qoyskaasi uu u noqdo mid farxad badan. Qof walbaa wuxuu ku haminayaa inuu la noolaado qofka riyadiisa ah. Laakin qof aanan dooqaagaba ahayn inaad la noolaato wey adag tahay.


Muhiim ma ahan qofka aad guursaneyso inuu ahaado taajir ee muhuumadu waxay tahay inaad adigu ku faraxsantahay. Macno ma sameyneyso hadduu lacag kastaa qofka leeyahay balse aadana adigu ku qanacsaneyn. Maalinta guurka ma ahan inay noqoto maalin murugo leh ee waa inay ahaataa maalin farxad badan.

Waxaa inta badan la arkaa lamaane isguursanayo misana midkood uu ka muuqato murugo qaasatan gabadha. Dadka intooda badan waxay umaleeyaan in gabadhu ay ka baqeyso habeenka aqal galka balse sidaas ma ahan. Maxaa keenayo cabsidaasi? Wax kale ma ahan waa nin aysan aqoonin dhaqankiisa, kaftankiisa, la hadalkisa iyo qofka uu yahay. Ma taqaano sida ay wax noqonayaan sidaa darteed waxay xaq u leedahay inay cabsato.


Waxaa suurto gal ah in ay xiriir la leedahay qof kale oo ay jeceshahay misana heysato oraahdii ahayd, Murugo jaceyl maxaa ibaday?


Guurka waa mid soo jireen ah, soona bilaawday waa hore, hadda dadyowga dunida waxay leeyihiin nidaamyo iyo caadooyin kuwaasoo inta badan ku saleysan dhaqan, dhaqaalo, diin iyo wada noolaasho.


Dhaqankeenii hore waxaa kamid ahaa, lamaanaha isguursanayo in la isu guuriyo laakin hadda waa gabaabsi. Waxaan kor ku soo xusay in guurka la isku guuriyo dhibaatooyinkiisa ay badan yihiin.


Waxaa dhacday nin oday ahaa oo dhalay gabdho fara badan, gabdhihiisa waxaa inta badan soo doontay rag aysan is afgaraneyn macnaha uusan heshiis dhex marin.


Gabadhii ugu horeysay ee la soo doontay raali kama aysan ahayn ninkaasi soo doontay, iyadoo ixtiraameyso waalidkeed ayeey ninkaasi guursatay, maalmo markuu qabay ayuu gabadhii soo furay. Wuxuu ku ciyaaray gabarnimadeeda iyo sharafteeda. Hadeey iyada dooqan lahayd waxay ahaan lahayd wax kale. Midkii ay dooqan lahayd waxaa ka hor istaagayo waalidkeed. Alla Murugo jaceyl maxaa ibaday?


Markii la weydiiyay maxaa dhacay waxay tiri isma fahmeyno ninkaasi, ixtiraam aan waalid ahaan kuu ixtiraamayo ayaana sidaas u sameeyay. Ninkii markii asiga la weydiiyayna wuxuu ku jawaabay gabadhu ma aysan ahayn bikro.


Marka qof nuucaas ah in loo guuriyo caruurta bilaa rabitaankooda waa qalad weyn oo laga galayo caruurta. Caruurta waalidooda weey ixtiraamayaa laakin iyagana waa inay gartaan wanaagooda. Gabdhii labaad sidoo kale wuxuu ku daray nin kale bilaa rabitaankeed, labo bil kadib wuu soo furay.


Waalidiinta qaarkood waxay fiiriyaan ninka lacagta uu leeyahay iyo reerka uu ka dhashay laakin ma fiiriyaan mustaqbalka gabadhooda iyo nolosha ay ku noolaan lahayd.


Waalidkii qaladkii hore kama aysan tusaale qaadanin waxay markale qalad ka galeyn gabadhoodii. Ugu dambeys waalidkii waxay go,aan ku gaareyn inaysan nin dambe u guuri doonin gabadhooda nin aysan iyada keensanin, oo hada laga bilaabo ay la ciyaari doonaan dooqooda. Taasi waxaan ka fahmi karnaa in dooqu cajiib yahay, noloshu ay farxad yeelaneyso markuu qofka guursado qof rabitaankiisa ah oo uu jecelyahay.



2. Waa maxay Shukaansi


Erayga shukaansi waa eray macno fara badan xambaarsan, caado ahaan marka la soo qaato macnaha erayga shukaansi waxay dadka intooda badan u dheg taagayaan nin iyo naag haasaawe dhex marayo. Sidaas ay jirto ayaan maanta waxaan jecelnahay inaan halkaan ku falanqeyno macnaha shukaansiga uu xambaarsanyahay.

Faaidada shukaansiga uu guurka u leeyahay ma ahan wax inta lagu soo koobi karo balse waxaan isku dayeynaa inaan halkaan ku sharaxno xiriirka ka dhexeeyo guurka iyo shukaansiga.


Shukaansigu wuxuu yimaadaa markaad qof ka hesho misana aad rabto inaad guur la wadaagto si aad qofkaasi nolosha ula wadaagto. Shukaansigu waa sheeko ka bilaabato waan ku arkay waan ku caashaqay, waxaana ku xigo in la isu adeegsado erayo macaan oo shukaansi ah.


Guurku wuxuu dhadhan leeyahay markii lamaanuhu xiriir jaceyl dhex maro. Haddii la isguursado xittaa oo lakala tago wax dhib ah malahan maxaa yeelay ma aysan ahayn lamaane la isku qasbay. Shalay iyagaa isguursaday, maantana iyaga kala tagay. Qaladaad inuu dhaco waa qeyb kamid ah nolosha, in wax la qaldo waa wax caadi ah, hadaanan wax la qaldi lahayn lama barteen waxa saxda ah.


Erayga shukaansi ama sidoo kale loo yaqaano Haasaawe wuxuu leeyahay macno fara badan, waxaa jiro erayo kale oo la macna ah sida xodxodasho, haasaawe, sheekeysi, dhedeysi iyo erayo kale. Erayga shukaansi wuxuu sidoo kale noqon karaa qalqaalo, soo jiidasho, inaad qof ka dhaadhiciso dareenkaaga ama rabitaankaaga.


Shukaansi kaliya looma isticmaalo guurka ee sidoo kale waxaa loo isticmaalaa si kale. Waxaa kamid ah markaan rabo inaan aabahay lacag ka soo qaato, waxaan dhihi jiray, waxaan soo shukaaminayaa Aabe, taasoo aan ula jeedo inaan ku soo qalqaaliyo kana gado waxa aan rabo.


Waxaan hadda ka hor jecleystay inaan galabtii aado iskuul Computer Course ah si aan u barto isticmaalka Kombiyuutarka sida Software Program, nasiib daro iskuulku wuu iga fogaa, waxa uu ku yiilay xaafada Baar Ubax, Suuqa Bakaaraha ee caasimada Soomaaliya Muqdisho.


Lacagta iskuulku wuxuu ahaa xiligaas 10$, waxaa sii dheeraa inaan bas u sii raaco, waxaan u sii baahnaa oo kale biyo cabaal. Aabe waxaan ka dhaadhiciyay in iskuulku uu yahay mid kamid ah iskuulada ugu caalimisan magaalada Muqdisho. Shukaamin kadib wuu iga aqbalay. Wuxuu igu dhahay wax walbaa oo aad wax ku baraneysid aniga dhib iguma ahan. Waayoo waa mustaqbalka caruurteyda.


Xiligaasi waxay ahayd xili magaalada hogaamiyo kooxeedyo ay heysteen oo ay aad u adkeyda isu socodka shacabka. Muqdisho waxay u qeybsaneed labo, waqooyiga iyo Koonfur, waxay lahayd qad cagaaran.


Hadaba erayga shukaansi markaan ku soo laabano waa eray nuucyo badan balse muhiimadeenu waa xiriirka ka dhexeeyo guur iyo shukaansi. Erayga xodxodasho waxay la micno tahay shukaansi laakin waxay qaas u tahay raga weliba waxaan dhihi karnaa oo lagu macneyn karaa, markaad rabto inaad qof ku qalqaaliso guur ama gabaabsi iyadoo hal qof awood dheeraad ah la saarayo.


Haasaawe: Haasaawuhu waxuu u badan yahay ama lagu tilmaami karaa sheeko caadi ah oo dhex mareyso laba ruux oo horay isu shukaansaday, xiriir jaceyl dhex maay misana raba in ay guur wadaagaan.


Xiriirka Guurka: Xiriirku waa mid kamid ah marxadalada ugu dambeyso ee labada qofood wadaagaan, hadaan hadalka sii jilciyo ama aan sii lafo guro, waaa shukaansiga dhex maro laba qofood, wuxuu guntiisa iyo gunaanadkiisa noqon guur iyo gabaabsi. Calashaan waa lagu heshiin guurka ama waa lagu kala tegi.


Halkaan waxaan kugu diyaarinay 3 su,aalood jawaabahooda ka hor shukaansiga gabdhaha hadddii aad rabto inaad wax ka ogaato riix halkaan.


3. Xaflad Aroos


Waa la isa shukaansaday, waxaa la is yiri erayo jaceyl ah oo soo jiidasho leh ugu dambeysna waxaa lagu heshiiyay guur. Yuhuuuu, waxaa dhacayo xaflada aroos iyo Nikaax. Maanta laga bilaabo ma nihin laba qofood oo kala ajnabi ah ee waxaa nahay lamaane gaaray guusha hadafkooda. Waa maalin farxad badan kana farxad badan maalmaha kale, laakin waa goortee?


Dabcan markaad dooqaada guursaneyso. Waxaa bilaabaneyso qorida warqad nikaax, ogolaanshaha guurka iyo meherka gabadha, kadibna alalaaska guurka. Ululuuuu iyo sacab. Maalin ku weyn qoyska iyo lamaanaha. Xaflada arooska kadib maxaa dhacayo? Jawaabta in guriga la tago, la duceysto misana la isu mahadceliyo. Allah ayaa mahad leh!


Aroosada: Waad ku mahadsantahay inaad riyadeydii rumeysay

Arooska: Adigana waad ku mahadsantahay inaad raggoo idil aniga iga dooratay

Arooska oo hadalkiisa sii wato ayaa wuxuu leeyahay..


  • Sidii uur jiif yaroo

  • Aan weli dibada imaano

  • Ubucda hooyadii ku jira

  • Adaan ogsajiinkiyo

  • Anfaaciga kaa helaaa

  • Arwaaxda nafteyda iyo taada

  • Ayaa gacalooy isku xidhan

  • Sucaad oorideydiyeey

  • Indhaha adigaa u roon

  • Adaa sambabada dagoo

  • Oofada beerkiyo wadnaha

  • Adaan aqal kaaga dhigay

  • Asal barashadeediyo

  • Aroos iyo la aqal galkeed

  • Midii aan ku aflaxaay

  • Ileyskii noloshaa tahoo

  • Aduunka intaan jiro

  • Allay lahee aragsaneey

  • Wallee abid kaama tago

  • Sucaad oorideydiyeey

  • Indhaha adigaa uroon

  • Adaa samababada dagoo

  • Oofaha beerkiyo wadnaha

  • Adaan aqal kaaga dhigay

Maxamed Xasan Xuseen La foole iyo heestiisii macaaneyd ee uu u qaaday xaaskiisa "Midaan ku Aflaxay".


Dhamaad


Marka hore waad ku mahadsantahay inaad halkaan nagu soo booqatay si aad wax uga ogaato erayga quruxda badan ee guur iyo macnaha uu xambaarsan yahay. Marka xigta waxaan kuu rajeyneynaa guur farxad leh iyo nolol bilaa murugo ah. Haddii aad guursatayna hambalyo!


Sidoo kale halkaan waxaan kugu diyaarinay erayo kale oo loo isticmaalo shukaansiga misana macaan oo muuqaal leh, riix halkaan.